नेपाल ललितकला प्रज्ञा–प्रतिष्ठान र राष्ट्रिय विपद् जोखिम न्यूनीकरण तथा व्यवस्थापन प्राधिकरणको संयुक्त आयोजनामा बिहीबार (२०८३ असार ४ गते ) बाट प्रतिष्ठानमा ‘विपद्को चेतना, कलाको अभिव्यक्ति’ शीर्षकमा विपद् व्यवस्थापनका सन्देश बोकेका कार्टुन कलाको प्रदर्शनी सुरु भएको छ । प्रदर्शनीको राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख प्रदीपकुमार कोइरालाले  उद्घाटन गर्नुभयो । उहाँले कलामार्फत विपद्सम्बन्धी जनचेतना दिनु निकै नै प्रभावशाली भएको बताउनुभयो । विपद् व्यवस्थापनको बुझाइलाई विद्यालयको प्राथमिक तहबाटै सिकाउनुपर्ने आवश्यकता औँल्याउँदै उहाँले प्रदर्शनीको अवलोकन गर्दा निकै हर्षित भएको र आगामी वर्षमा यस्ता कार्यक्रमलाई निरन्तरता दिने बताउनुभयो । कार्यक्रममा प्रतिष्ठानका निवर्तमान प्राज्ञपरिषद् सदस्य सौरगङ्गा दर्शनधारीले कलामार्फत विपद्का विविध पाटोलाई दर्साई जनचेतना फैलाउने अभिप्रायले गरिएको यस्ता कलाप्रदर्शनीले आगामी दिनमा पनि निरन्तरता पाउने विश्वास व्यक्त गर्नुभयो । कार्टुनिस्ट क्लब अफ नेपालका अध्यक्ष तथा प्रतिष्ठानका निवर्तमान प्राज्ञसभा सदस्य वासुदेव श्रेष्ठले विपद् व्यवस्थापनका विषयमा प्रतिष्ठानमा गरिएको यो दोस्रो प्रदर्शनी रहेको र प्रदर्शनीले विपद्का विषयवस्तुलाई सरल ढङ्गबाट बुझाउन मद्दत पुग्ने बताउनुभयो ।
कार्यक्रममा राष्ट्रिय विपद् जोखिम न्यूनीकरण तथा व्यवस्थापन प्राधिकरणका पदाधिकारी तथा कर्मचारी, प्रतिष्ठानका कर्मचारी, कलाकार, पत्रकारलगायतको सहभागिता रहेको थियो । प्रदर्शनीमा बासु क्षितिज, अविन श्रेष्ठ, देवेन्द्रकुमार काफ्ले, रविन्द्र मानन्धर, रवि मिश्र, भानु भट्टराई, अर्पिता शाक्य, विश्व थापा, सुदर्शन सिग्देल, पल्पसा मानन्धर, सानुराज डङ्गोल, राजेश मानन्धर, दीपक गौतम, महेश बस्ताकोटी, केशवराज खनाल, कृष्णगोपाल श्रेष्ठ, योगेश खपाङ्गीलगायतका १७ कलाकारका २० र अघिल्लो वर्षका २६ गरी कलाकृतिसमेत गरी ४६ कलाकृति राखिएको छ । प्रदर्शनी असार १० गतेसम्म चल्ने छ ।