नेपाल ललितकला प्रज्ञा–प्रतिष्ठानको लुम्बिनी प्रदेश समन्वय समितिको सहकार्यमा शनिवारबाट (२०८२ चैत ७ गते )६१ औँ अन्तर्राष्ट्रिय जातीय तथा रङ्गभेद उन्मूलन दिवसको सन्दर्भ पारेर कलाकार राजकुमार बिकको एकल चित्रकला प्रदर्शनी ‘सह– अस्तित्व’ सुरु भएको छ । प्रदर्शनीको प्रतिनिधि सभाका नवनिर्वाचित सदस्य हरिप्रसाद भुसाल र प्रतिष्ठानका कुलपति नारदमणि हार्तम्छालीले उद्घाटन गर्नुभयो । कार्यक्रममा प्रतिनिधि सभाका नवनिर्वाचित सदस्य हरिप्रसाद भुसालले आफू पनि कला क्षेत्रसँगै जोडिएको व्यक्ति भएकाले समाजसँग जोडिएको महत्त्वपूर्ण विषयमा आयोजित कार्यक्रममा सहभागी हुन पाउँदा खुसी लागेको बताउनुभयो । उहाँले प्रदर्शनीमा राखिएका कलामा रङ र आकृति मात्र नभई मानवीय आवाज, संवेदना प्रकट भएको धारणा राख्नुभयो । नेपाल ललितकला प्रज्ञा–प्रतिष्ठानका कुलपति नारदमणि हार्तम्छालीले कलाकार राजकुमार बिकले समाजमा छुवाछुतविरुद्धको अनुभूतिगत भाव सन्देशात्मक अभिव्यक्ति आफ्ना चित्र, रचनाहरूमा गरेको बताउनुभयो । उहाँले बिकले विभेदको मुद्दालाई आफ्नो कन्टेन्ट कन्सेप्ट राखेर क्राफ्टम्यानसिप स्वरूपमा सामाजिक–सांस्कृतिक रूपान्तरणका लागि कलात्मक विद्रोहको अभियान आफ्ना रचनाहरूमा थाल्नुभएको धारणा राख्नुभयो ।
प्रतिष्ठानका सदस्य सचिव देवेन्द्रकुमार काफ्ले ‘थुम्केली’ले हाम्रा मौलिक, रैथाने शिल्पज्ञान कला, सिप सिर्जनालाई प्रवर्धन तथा संरक्षण गर्न अपरिहार्य रहेको बताउँदै राजकुमार विकका कलामा मौलिकताका साथ प्रकृति, संस्कृति तथा समाजको चित्रण भएको बताउनुभयो । उहाँले समाजमा उत्पीडनमा परेका समुदायका विषयलाई केन्द्रीकृत गर्दै सामाजिक जागरण, सचेतना विषयलाई राजकुमार विकले आफ्नो कलामा उठाउनुभएको धारणा राख्नुभयो ।
प्रतिष्ठानका शिल्प–हस्तकला विभाग प्रमुख अरुणा हिङमाङले ६१ औँ अन्तर्राष्ट्रिय जातीय तथा रङ्गभेद उन्मूलन दिवसको सन्दर्भ पारेर यस किसिमको कार्यक्रम गरिनुले समाजमा सहअस्तित्व र समानताका लागि महत्त्वपूर्ण भूमिका खेल्ने बताउनुभयो ।
प्रतिष्ठानका लुम्बिनी प्रदेश समन्वय समिति संयोजक तथा मूर्तिकला विभाग प्रमुख दिनेश्वर महतोले ‘सामाजिक रूपान्तरणः ललितकलाको अभियान’ भन्ने मूल भावलाई जोड्दै यस कार्यक्रमको आयोजना गरिएको बताउनुभयो । सामाजिक सचेतनामा यस कार्यक्रमले विशेष अर्थ राख्ने विचार राख्नुभयो ।
पूर्व सचिव डा. मानबहादुर बिकले देशका विभिन्न भागमा छरिएर रहेका प्रतिभाहरूलाई खोजी गरी तिनका कलालाई मूलधारमा ल्याउन प्रतिष्ठानले गरेको प्रयास प्रशंसनीय रहेको बताउनुभयो ।
कलाकार राजकुमार बिकले कलाको विषयगत धरातलमा शोषित तथा उत्पीडित समुदायका कथा र अनुभूतिलाई रङ र ब्रसका माध्यमबाट क्यानभासमा जीवन्त बनाउँदै यस प्रदर्शनीमार्फत श्रमचेतना, सामाजिक जागरण र सचेतनालाई अझ सशक्त ढङ्गबाट उठान गरेको बताउनुभयो ।
कार्यक्रममा प्रतिष्ठानका प्राज्ञपरिषद् सदस्य प्रदीप अधिकारी, प्राज्ञसभा सदस्य चन्द्रकुमार राई, अग्रज कलाकारहरू राधेश्याम मुल्मी, अशोकमान सिंह, पूर्व सचिव डा. मानबहादुर बिक, डा. द्रोण रसाली, नेपाल कमर्सियल आर्टिस्ट सङ्घका कार्यवाहक अध्यक्ष सुभाष शाक्य, तानसेन गुठीका पूर्वअध्यक्ष प्रमी श्रेष्ठसँगै कलाकार, पत्रकारलगायतको सहभागिता रहेको थियो । चैत १० गतेसम्म चल्ने प्रदर्शनीमा ३५ कलाकृति राखिएको छ ।