नेपाल ललितकला प्रज्ञा–प्रतिष्ठानको आयोजना तथा काठमाडौँ महानगरपालिकाको सहकार्यमा आइतबार (२०८२ मङ्सिर १४ गते) ‘नेवाः लोककला अन्तक्र्रिया तथा कला कार्यशाला’ सम्पन्न भएको छ । कार्यक्रमको प्रतिष्ठानका कुलपति नारदमणि हार्तम्छाली र संस्कृति, पर्यटन तथा नागरिक उड्डयन मन्त्रालयका संस्कृति महाशाखा प्रमुख सहसचिव डा. सुरेश सुरस श्रेष्ठले उद्घाटन गर्नुभयो ।
कार्यक्रममा प्रतिष्ठानका कुलपति नारदमणि हार्तम्छालीले यस कार्यक्रमले पहिचान र कला जागरणको कुरा उठाएको बताउनुभयो । उहाँले कार्यशालामा सहभागीले संस्कृतिलाई कलाको बिम्वीकरण गरेर देखाएको कला महत्त्वपूर्ण भएको धारणा राख्नुभयो ।
संस्कृति, पर्यटन तथा नागरिक उड्डयन मन्त्रालयका संस्कृति महाशाखा प्रमुख सहसचिव डा. सुरेश सुरस श्रेष्ठले नेपालमा योःमरि जस्ता विभिन्न अभौतिक सांस्कृतिक सम्पदा लुकेर रहेको र त्यसलाई संरक्षण गर्नुपर्नेमा जोड दिनुभयो ।
प्रतिष्ठानका सदस्य सचिव देवेन्द्रकुमार काफ्ले ‘थुम्केली’ले नेवाः समुदायको परिचय बोकेको योमरीलगायतका लोककलाको संरक्षण, प्रवर्धन तथा पुस्तान्तरण गरिनु अहिलेको आवश्यकता भएको बताउनुभयो ।
प्रतिष्ठानका वास्तुकला तथा लोककला विभाग प्रमुख प्रदीप अधिकारीले लोककला, संस्कृतिको संरक्षण र पुस्तान्तरणको उद्देश्य राखेर यस कार्यक्रमको आयोजना गरिएको बताउनुभयो । उहाँले आगामी दिनमा यस किसिमका कार्यक्रमलाई निरन्तरता दिँदै जाने धारणा राख्नुभयो ।
समारोहमा त्रिभुवन विश्वविद्यालयको नेपालभाषा केन्द्रीय विभागका सहप्राध्यापक डा.राजनलाल जोशीले ‘यःमरिः कलाकारिताको प्रारम्भ’ विषयमा कार्यपत्र प्रस्तुत गर्नुभएको थियो । सो कार्यपत्रमाथि कलाकार तथा कार्यक्रम संयोजक मनरा प्रजापतिले टिप्पणी गर्नुभएको थियो । कार्यक्रमको प्रशिक्षकका रूपमा सुमन महर्जन रहनुभएको थियो भने कलाकार सम्झना राजभण्डारीले पनि यःमरि कलाका बारेमा आफ्ना अनुभवको चर्चा गर्नुभएको थियो ।
